2013/04/02

[日劇]《最高の離婚》~果然很不賴啊~(完成﹗)

原來有人說《不能戀愛的理由》、《不結婚》和呢部《最完美的離婚》(咁樣譯即刻唔型囉個名)係結婚三步曲(其實可能無乜關連既)…噢,咁我係咪要睇吓中間那部?頭一部我留意只係因為安室唱的片頭片尾歌,劇只看到中段咋。

又說因為博友大推於是小的開了《最高之離婚》(都係咁叫順口啲)來看,好有趣喎﹗雖然,真木陽子我本身麻麻地的…

近年看日劇很多都爛尾(最新推介是《Monsters》),很難得這部是只看了第一集已很想看下去,好喜歡小品式幽默風格,一開始濱崎光生(瑛太)邊整牙邊如絮絮唸老婆啲野,以為係intro啦,點知成集佢去了四、五次,次次都係咁話好痛苦好痛苦,咁就梗係好好奇佢老婆結夏(尾野真千子)令到佢有幾痛苦…噢,原來係光生本身有潔癖,對事物一絲不苟,自然唔鐘意老婆不拘小節又大情大性啦。then返屋企影佢地二人的時候又好似偷拍咁從廚房天花pan番去廳度,這…是真人騷嗎?

光生一返屋企見到結夏請晒成班同學番嚟飲飲食食,好似完全唔知情咁,之後結夏話佢一早講過,光生又好似唔知…仲係咁話我無嬲我無嬲咁…好好笑…

平時啲劇既男角要訴苦多數去居酒屋咖啡廳或者街邊拉麵檔,去牙醫真係夠創新。講起上嚟,以前睇《素直》、《last friends》、《voice》呢,瑛太啲角色唔係懶係愛在心裡口難開又有一堆理由想愛而不能愛(《voice》其實唔係呢類的),次次都睇到把幾火…今次演小男人,好似好少見佢做啲咁生活化既角色…睇佢個西裝版加老套眼鏡郁又好入型入格,啲小動作又勁佬…好好笑…


尾野真千子是第一次看吧?完全想不起她是誰…看一看維基,我只看過《救命病棟24時》…但我完全想不起她演甚麼護士角色喎﹗大囧﹗

跟住劇情有交代二人點解會結成夫妻…噢,又唔怪得會走在一起又唔怪得會唔夾了。而佢地想離婚時走去print申請書,不停print不停寫錯卒之因為printer食紙而不了了之…笑咗。但對照番現代愛情故事(我又攪爛gag了),就係咁來得易去得快很兒戲的吧﹗

我完全無mention到另一pair上原燈里(真木陽子)和上原諒(綾野剛)了?﹗XD…呀,片尾播主題曲…竟然是桑田佳佑叔叔﹗襯埋四位主角著行老西晚裝跳埋啲怪怪地既舞…爆笑度一百巴仙﹗

呀,另一pair上原夫婦你以為佢地結咗婚的時候原來男的無交到結婚申請書…即係無結到…詭異﹗跟住燈里原來係光生前女友…噢,咁之後梗係大家對結婚感到疑惑,各懷心事的時候四人相遇,跟住走在一起大家互動再思考結婚的真義吧﹗

唔知呢,我真係唔太鐘意真木陽子,佢成日做啲不經意出現在男角身旁又懶係COOL又懶係成熟的角色,跟住自己有問題又唔出聲懶係自己攪掂咁,加埋永遠唔知點解佢劇入面一定係一個頭盔咁既髮型讓人看得很不舒服…呃…真係唔知點解…哈…係啦,我就係講緊《遲開的向日葵》。

<--巧性感﹗

啲幽默攪笑位不突兀而且幾有心思,令我想起《不能結婚的男人》(第二集光生去影帶舖租戲睇真令我想起《不》劇成日惡攪著名西片,不過光生睇的是…甜片…XD),又或者《紳士的品格》(一開始啲小劇場真係不能miss…),呢啲笑住嚟思考人生真義的劇我LIKE呀…

不過《Legal High》仲有三集幾四集,努力清埋佢先﹗

以上。

《最高之離婚》@維基
*****************************************************
嘩﹗睇完了﹗一路睇的時候覺得既然四人從離離合合中思考到結婚的真義,仲諗會唔會真係散晒收場重新上路,但竟然係大團圓,不過都無話唔好既,諗過度過先作出的選擇,當事人覺得可以就得啦(咦,我就乜好似講朋友咁?)

尾二一集光生去咗秋葉原睇idol時由唔慣變成真切投入…我笑爆咀了,仲以為佢會撞到喺秋葉原做女僕maid的結夏添﹗

好喜歡光生因為瞓唔著而對住空櫈講對結夏的感覺一場,雖然光生講嚟講去都係話將結夏的存在當成理所當然,無講到話鐘唔鐘意佢呀咁,不過對光生而言呢個就係佢對結夏愛既表達吧﹗後尾幾集幾個主角都成日有一大段solo獨白,個人都係鐘意睇光生和結夏的一part,上原夫妻無啦啦有咗…又無啦啦復合…都係神化囉…

女麻女麻都會落pub飲番兩杯的了?

結尾一集濱崎夫妻多了好多回憶,連兩隻貓點嚟都講埋,對照番頭幾集,光生真係改變咗好多,佢會體諒番結夏,雖然…都仲係會去整牙同埋講好痛苦…XD


最後,很爆﹗片尾首歌啲舞變咗瑛太攪另外扮緊紙牌人的三個拍檔﹗仲有桑田大叔出現添﹗

呢套劇唔好講到咁大話要考究結婚真義咁誇啦,就咁當一套小品睇都唔錯的。

8 則留言:

  1. 我很喜歡瑛太,在「愛在心裡口難開」之前,他專做浪子的XDDD(即是夾band,衣著烏where,真where嗰隻)

    回覆刪除
    回覆
    1. re:brownie

      我唔係睇過佢好多劇咋(或者睇咗唔記得),我有印象的已經係《交響情人夢》…都唔算係夾band?雖然我記得佢係染金毛的…XD

      佢邊套做過浪子﹗﹗﹗我會想睇架﹗

      刪除
  2. 我睇過你所指的結婚三步曲的第一曲呀~
    唔錯呀!
    我都見有人贊第二曲呀~
    而最尾呢曲都好似唔錯...
    搞到我2部都想睇呀...

    請你掃雷先XD

    回覆刪除
    回覆
    1. RE:星晴

      《不結婚》都好似有幾多人讚…呢一兩年好似幾多日劇唔錯,睇了一大水泡劇而家想轉吓口味睇番日劇了…

      呢套《最高》唔雷呀…《不能戀愛的理由》我麻麻,《不結婚》睇吓有無興趣啦之後…哈

      刪除
  3. 不知不覺原來我睇晒三部曲
    三套都唔錯,同樣係可以一集駁一集唔覺唔覺咁睇晒
    但同樣到最尾個集有D趕住要比個HAPPY ENDING大家
    只係最高入面上原燈里同上原諒呢PAIR真係好詭異
    一個唔聲唔聲總係好假咁...一個天然到好奇怪...或者佢地呢D叫天生一對...

    回覆刪除
    回覆
    1. re:散漫生活

      《不能戀愛的理由》我睇了幾集,無乜心機睇,加上那時候又掛住追韓劇…哈哈
      而家睇緊《legal high》的關係只係試吓好唔好咁樣睇《最高的離婚》,《legal high》睇到第8集…快完成的了﹗
      又係喎,上原夫婦居然可以咁唔小心既,而阿燈里要轉姓做上原的時候唔使搵張結婚證書嚟做supporting,係就咁改自己個名的寫法就可以的了?(唔知日本文件東東的人字…)

      刪除
  4. 三部曲我睇左兩部曲,一頭一尾XD
    《我不能戀愛的理由》係為左吉高由里子而衝去睇,不錯不錯,去到結局我覺得吉高果段戀情我係最鐘意,應該話係現實中最真實。

    《不結婚》唔好睇啊TAT故仔幾悶吓
    我睇左一集已經放棄左XD玉木宏已經無比之前甘殘,但佢而家吸引唔到我睇佢做戲...(想當年我真係為左佢而追睇love shuffle,最後被松田翔太同吉高吸引左XDD)

    "最高的離婚"最好笑係瑛太講左句"這樣就無法做既funky又monkey的family了啊 ",我當埸爆笑LOL
    好鐘意有一段係瑛太自己一個人坐到椅子上假裝結夏仲係度同佢傾計...佢真係做戲越來越好!

    回覆刪除
    回覆
    1. RE:小木

      《不能戀愛的理由》呢,唔知點解我唔係太鐘意睇香里奈和真木陽子,兩個人的劇我都係除非有個好吸引的男角先有動力去睇…XD

      玉木宏又真係殘咗好多年,無晒做《交響情人夢》時既風采,唔知點解,俾其他上位男角搶晒風頭了…

      睇《最高的離婚》見瑛太做埋啲佬味十足的行為就好好笑,雖然佢成日睇唔順眼老婆的行為習慣喺度話好痛苦好痛苦,但佢二人好夾丫,鬥吓咀幾好笑咁…

      呢套呢…睇得開心過《素直》睇佢懶係有一千萬個不能愛的理由咁…

      刪除

要講幾句嗎?﹗XD